काठमाडौँ/धनधान्य र सम्पन्नताकी देवी महालक्ष्मीको पूजा आराधनासहित आज कोजाग्रत पूर्णिमा मनाइँदैछ ।
यसैसँगै १५ दिन लामो बडादसैँ पर्व पनि समापन हुँदैछ ।
आश्विन शुक्ल पूर्णिमाका दिन महालक्ष्मीको विशेष पूजा गरी रातभर जाग्राम बस्ने परम्परा रहिआएको छ ।
धार्मिक विश्वास अनुसार यस रात जाग्राम बसेका घर–घरमा देवी महालक्ष्मी प्रवेश गरी धन, ऐश्वर्य र सम्पन्नताको आशीर्वाद दिन्छिन् ।
नेपाल पञ्चाङ्ग निर्णायक विकास समितिका अध्यक्ष प्रा. शम्भुप्रसाद ढकालका अनुसार आज अखिल बलिपूर्तिसमेत गर्ने शास्त्रीय विधान छ ।
विजयादशमीदेखि सुरु भएको टीका–जमरा थाप्ने क्रम पनि आजै अन्त्य हुने परम्परा छ । साथै, जमरालाई नजिकैको नदी, पोखरी वा पवित्र तीर्थस्थलमा सेलाउने गरिन्छ ।
नवरात्रदेखि सुरु भएको दुर्गा पक्ष आश्विन शुक्ल प्रतिपदादेखि पूर्णिमासम्म चल्छ ।
देवी दुर्गाका तीन रूपमध्ये एक महालक्ष्मीको विशेष आराधना गरेर दुर्गा पक्षलाई बिदा गर्ने धार्मिक मान्यता छ । यस पूर्णिमालाई ‘कौमुदी पूर्णिमा’ पनि भनिन्छ ।
आजै रात जुवा खेल्ने प्रचलन पनि रहेको समितिले जनाएको छ ।
महालक्ष्मीको आराधनासँगै हात्तीमा आरोहण गरेका इन्द्रको पूजा गर्ने चलन छ भने कार्तिक स्नान र तुलसी पूजा आगामी मङ्गलबार असोज २१ गतेदेखि सुरु हुँदैछ ।
सोही दिनदेखि आकाशदीपदानको विधि पनि आरम्भ हुनेछ ।
