झापा/ सुनसरीको चतरास्थित सप्तकोसी नदीमा पानीको बहाव सतर्कता तह पार गरेसँगै स्थानीय बासिन्दालाई उच्च सतर्कता अपनाउन जल तथा मौसम विज्ञान विभागले आग्रह गरेको छ।
आइतबार बिहान ५ बजे विभागले जारी गरेको सूचनाअनुसार पछिल्ला घण्टादेखि निरन्तर वर्षा भइरहेकाले सप्तकोसीको जलस्तर तीव्र गतिमा बढ्दै गएको र बेलुकासम्म बाढीको जोखिम झन् बढ्न सक्ने चेतावनी दिएको छ।
सूचनामा भनिएको छ, “सप्तकोसी चतरामा बहाव सतर्कता तह पार गरेको छ। भारी वर्षा भइरहेकाले र आज बेलुकासम्म निरन्तर रहने भएकाले कोसी नदीमा बाढी बढिरहेको छ। बाढी र डुबान हुने सम्भावित क्षेत्रमा अति उच्च सतर्कता अपनाउनु हुन अनुरोध छ।”
विभागले सम्भावित बाढी प्रभावित क्षेत्रमा बसोबास गर्ने स्थानीयबासी, सुरक्षा निकाय तथा विपद् व्यवस्थापन निकायलाई अग्रिम तयारीसहित सजग रहन आग्रह गरेको छ।
यसैबीच, अविरल वर्षाको कारण इलामको देउमाई नगरपालिका र माङ्सेबुङ गाउँपालिका बीच पर्ने देउमाई खोलाको पुल शनिबार राति आएको बाढीले बगाएको छ।
बाढीका कारण आसपासका केही घर समेत बगाएको स्थानीय सुरेन्द्र लिम्बुले जानकारी दिएका छन्।
