झापा/ बडादसैँ अन्तर्गतको नवरात्रि पर्व आज आठौँ दिन मनाइँदैछ। यस दिन देवी दुर्गाको अष्टम स्वरूप महागौरीको विशेष पूजा–अर्चना गरिन्छ।
श्वेत वस्त्रधारी, शान्त र सौम्य स्वरूपकी महागौरी शुद्धता, करुणा र मोक्षकी प्रतीक मानिन्छिन्। चार भुजासहितको उनको प्रतिमा वृष वाहनमा आरूढ रहन्छ। भक्तजनहरूले आज बिहानै स्नान गरी उज्यालो रङका वस्त्र लगाएर दीप, धूप, पुष्प, फलफूल र मिठाई अर्पण गर्दै महागौरीको आराधना गरेका छन्।
पौराणिक मान्यताअनुसार महागौरीको पूजा–आराधनाले पाप विकृतिहरू नाश हुने, गृहस्थ जीवनमा सुख–शान्ति छाउने र मनोकामना पूर्ण हुने विश्वास गरिन्छ। विशेष गरी कन्या पूजन (कुमारी पूजा)लाई आजको दिन अत्यन्तै शुभ मानिन्छ। अष्टमी र नवमीको संधिकालमा संधि पूजा गरी १०८ वटा दीप प्रज्वलन गर्ने परम्परा पनि रहेकाले आजका मन्दिरहरूमा भक्तजनहरूको भीड बढेको छ।
ज्योतिषविद्हरूका अनुसार आजको शुभ रंग मोर हरियो (peacock green) हो। अष्टमी तिथि साँझ ६:०६ बजेसम्म रहने भएकाले भक्तजनहरूले यही समयसीमाभित्र महागौरीको विधिपूर्वक पूजा गर्न सुझाव दिइएको छ।
