_1693980289.gif "#")
काठमाडौं/चितवनको मुग्लिङ–नारायणगढ सडकखण्ड अन्तर्गत तुइनखोला पुल नजिक खसेको लगातार पहिरोले करिब ३६ घण्टादेखि यातायात ठप्प बनेको छ ।
यसले गर्दा हजारौँ यात्रु तथा यातायात मजदुर सडकमै बिचल्लीमा परेका छन् ।
असोज ३ गते साँझ साढे ६ बजेदेखि खस्न थालेको पहिरो अझै पन्छाउन नसकिएको हो ।
लगातार पहिरो खसिरहेकाले सडक सफा गर्न कठिनाइ भएपछि यात्रुहरू अलपत्र परेका छन् । लामो अवरोधका कारण खानपिनमा समेत समस्या देखिएको छ ।
यसबीच, मुग्लिङका स्थानीयवासीले पहल गर्दै यात्रु तथा मजदुरलाई खानपिनको सहयोग गरेका छन् । साथै, राइडर्स युनियन नेपाल चितवन जिल्ला कमिटीले बिस्कुट र पानी वितरण गरेको छ ।
उपाध्यक्ष आलोककुमार श्रेष्ठको नेतृत्वमा १५ सदस्यीय टोलीले २० कार्टुन पानी र २०० पिस बिस्कुट यात्रुहरूलाई बाँडेका युनियनका केन्द्रीय अध्यक्ष माधव पाण्डेले जानकारी दिनुभयो ।
सडक डिभिजन भरतपुरका अनुसार रातको समयमा पहिरो पन्छाउने काम स्थगित भएको छ ।
कहिले बाट सडक सञ्चालनमा आउने भन्ने विषयमा अझै अन्योल रहेको डिभिजनले जनाएको छ ।
तस्बिर : मुग्लिङ बजार पेज/आलोक श्रेष्ठ
