काठमाडौँ/ भदौ २३ र २४ गतेको जेनजी आन्दोलनले देशभरका प्रहरी चौकीहरूमा व्यापक तोडफोड, आगजनी र लुटपाट मच्चायो । उपत्यकामा त अधिकांश प्रहरी चौकी नै खण्डहर बनेका छन् ।
आन्दोलनकै क्रममा महाराजगन्ज र कोटेश्वर प्रहरी वृत्तमा तीन जना प्रहरीको ज्यानसमेत गएको थियो । यस्तो कहाली लाग्दो अवस्थाबाट गुज्रिए पनि नेपाल प्रहरी अहिले उच्च मनोबलसहित नागरिक सेवामा खटिएको छ ।
आगजनी र लुटपाटका कारण आफ्नो बर्दीसमेत गुमाएका प्रहरीहरू अहिले बर्दी विना नै जनसेवामा खटिन बाध्य भएका छन् । उपत्यकाका विभिन्न चोकमा रहेका ट्राफिक आइल्यान्डदेखि अन्य भौतिक संरचना ध्वस्त भएपछि बाँकी अवशेषमै उभिएर प्रहरीहरूले आफ्नो जिम्मेवारी निर्वाह गरिरहेका छन् ।
नेपाल प्रहरीको यो प्रतिबद्धता फेरि पनि देखाउँछ— कठिन परिस्थिति र साधनस्रोतको अभावबीच पनि प्रहरी नागरिक सेवामा दृढतापूर्वक खटिन सक्षम छ ।
