सुनसरी/ धरान वडा नं ११ र २० को सिमाना भएर बग्ने सर्दु खोलामा आज (शनिबार)बिहान करिब ३०–३५ वर्ष उमेर देखिने एक युवकको शव फेला परेको छ।
वडा नं ११ वानडाँडाका स्थानीयले खोलाले बगाएर ल्याएको अवस्थामा शव देखेपछि जनप्रतिनिधि र प्रहरीलाई खबर गरेका थिए। मृतकको शरीरमा केवल माथिल्लो भागमा मात्र कपडा रहेको बताइएको छ।
वडा नं ११ का अध्यक्ष लोकेन्द्र फागोका अनुसार शव कस्को हो भन्ने अहिलेसम्म पहिचान खुलेको छैन। शव वडा नं २० तर्फ भेटिए पनि त्यहाँ मानव बस्ती नभएको र पूर्वतर्फको वडा नं ११ मा बस्ती रहेको उनले जानकारी दिए।
घटनास्थलमा पुगेको सशस्त्र र जनपद प्रहरीले मुचुल्का तयार गरी शवलाई पोष्टमार्टमका लागि मर्चरीमा लगेको इलाका प्रहरी कार्यालय धरानका डिएसपी प्रकाश जबेगुले बताएका छन्।
