_योगेन्द्र योगी
सुन्दरहरैंचा/ सुन्दरहरैंचा नगर प्रमुख केदार प्रसाद गुरागाईले नगर अस्पताललाई आफैंको प्राथमिकता बनाएका छन्।
प्रायः हरेक दिन अस्पताल पुगेका उनी बिरामीहरुको स्वास्थ्य अवस्था बुझ्दै हौसला दिने गरेका छन्।
सुन्दरहरैंचा–१ मा रहेको नगर अस्पताल पुगेपछि नगरप्रमुख गुरागाईले बिरामीसँग स्वास्थ्य स्थितिबारे सोधपुछ गर्ने, सेवा सुविधा कस्तो छ भन्ने जानकारी लिने र चिकित्सकहरुसँग उपचारमा कुनै कमी कमजोरी नहोस् भनेर निर्देशन दिने गरेका छन्।
उपचाररत एक वृद्ध आमाले भनिन्, “म पहिलो पटक नगर अस्पताल आएको हुँ, सेवा सुविधा राम्रो छ, अलिक लाइन बस्नुपर्यो तर बाँकी सबै ठीक छ।
अझै आश्चर्य के लाग्यो भने पहिलो दिनमै नगरप्रमुख गुरागाईज्यू स्वयं भेटेर मेरो स्वास्थ्यबारे सोध्नुभयो। उहाँ साँच्चिकै अभिभावक हुनुहुँदो रहेछ।”
नगरप्रमुख गुरागाईले आफू नगर पिताको भूमिकामा रहेकाले बिरामी भेट्नु र समस्याबारे जानकारी लिनु दायित्व भएको बताए। बिरामीसँगको उनको आत्मीय व्यवहारले उपचारका लागि आउने धेरैलाई दङ्ग बनाएको छ।
नगर अस्पतालमा सुन्दरहरैंचाका मात्र नभई आसपासका पालिकाका बिरामी समेत आउँछन्।
यसैबीच अस्पतालको नयाँ प्रशासनिक भवन धमाधम निर्माण भइरहेको छ। झापाको दमकस्थित प्रविन निर्माण सेवा कम्पनीले जिम्मा लिएको उक्त भवन २०८४ वैशाख २५ भित्र सम्पन्न हुने जनाइएको छ।
