धरान/ धरान–१६ स्थित सियोन स्कुलले नेपाल परीक्षा बोर्डद्वारा लिइएको २०८१ सालको कक्षा–१२ वार्षिक परीक्षामा १०० प्रतिशत नतिजा निकाल्दै उत्कृष्ट उपलब्धि हासिल गरेको छ।
यस उपलब्धिलाई विशेष बनाउन स्कुलले शुक्रबार आफ्ना सफल विद्यार्थीलाई सम्मान गरेको हो।
स्कुलको सेमिनार हलमा आयोजित कार्यक्रममार्फत निर्देशक तथा प्रिन्सिपल खड्ग बहादुर थापा मगर, भाइस प्रिन्सिपल राकेस चौधरी, पिआरओ मान बहादुर थापा मगरलगायतले उत्कृष्ट विद्यार्थीलाई खदा र मायाको चिनो सहित सम्मान गरेका थिए।
समारोहमा बोल्दै निर्देशक थापा मगरले सफलताप्रति बधाई ज्ञापन गर्दै भने, “उच्च शिक्षा र सीप हासिल गर्न विदेश जानुहोस्, तर सकेपछि आफ्नै देशमा फर्केर केही गर्नुहोस्। हात डोर्याएर हुर्काउने आमा–बुबा, समर्पित गुरु र मातृभूमि कहिल्यै नबिर्सनुहोस्।”
त्यस्तै, भाइस प्रिन्सिपल राकेस चौधरी र प्लस–टु संयोजक अनुप अग्रवालले पनि विद्यार्थीलाई उच्च शिक्षामा सफलताको शुभकामना व्यक्त गरेका थिए।
स्कुलका अनुसार ४६ जना सहभागीमध्ये ४ जना विद्यार्थीले “ए प्लस”, ३३ जनाले “ए” र ९ जनाले “बी प्लस” प्राप्त गर्दै शत प्रतिशत सफलता हासिल गरेका छन्।
