धरान/ मोटरसाइकलमा बुबासँगै खोलामा बगेर बेपत्ता भएकी धरान–१६ की १९ वर्षीया अनिता राईको शव सप्तकोशी नदी किनारमा फेला परेको छ।
इलाका प्रहरी कार्यालय महेन्द्रनगरका प्रहरी निरीक्षक दिवस कुँवरका अनुसार बराहक्षेत्र–९ स्थित राजाबासमा (आइतबार)आज बिहान अनिताको शव भेटिएको हो।
“दाउरा खोज्न गएका स्थानीयले शव देखेपछि प्रहरीलाई खबर गरेका थिए,” निरीक्षक कुँवरले बताए। हाल कानुनी प्रक्रिया पूरा गरी शवलाई धरान पठाउने तयारी भइरहेको छ।
गत शुक्रबार दिउँसो करिब १:५० बजे बराहक्षेत्र–१ मा पर्ने मदनभण्डारी राजमार्गअन्तर्गतको दुधपानी खोलाले मोटरसाइकलमा सवार बुबाछोरीलाई बगाएको थियो।
धरान–१६ का जीवन राई र उनकी छोरी अनिता राई सवार मोटरसाइकललाई आकस्मिक बढेको भेलले बगाएपछि दुवै जना सप्तकोशीमा पुगेका थिए।
स्थानीयवासी र प्रहरीले तत्कालै बुबा जीवनलाई सकुशल उद्दार गरेका थिए। तर छोरी अनिता भने कोशीमा हराएकी थिइन्। त्यसयता प्रहरी, स्थानीय तथा कायकमार्फत दिनहुँ खोजी कार्य भइरहे पनि उनी फेला परेकी थिइनन्।
घटनापछि लगातार खोजी भइरहे पनि चार दिनपछि मात्रै सोमबार बिहान राजाबासमा अनिताको शव भेटिएको हो। यससँगै उक्त घटनाले धरान क्षेत्र शोकाकुल बनेको छ।
