तस्बिर: महासचिव प्रभाव खतिवडा र कोषाध्यक्ष शैलेश कुमार आचार्य
धरान/ नवनिर्वाचित सुनसरी उद्योग वाणिज्य सङ्घका अध्यक्ष गोपाल श्रेष्ठले महासचिवमा प्रभाव खतिवडा र कोषाध्यक्षमा शैलेश कुमार आचार्यलाई मनोनीत गरेका छन्। पहिलो बैठकमै दुई पदाधिकारी मात्र तोकिँदा बाँकी पदाधिकारी भने विधान संशोधनपछि भदौको पहिलो सातामा टुंगो लाग्ने भएको छ।
विधान अनुसार बिहीबार बसेको पहिलो बैठकले नवनिर्वाचित सदस्यहरू मध्येकै दुई पदाधिकारी मात्र मनोनयन गरेको हो। बाँकी पदाधिकारी भने विशेष साधारण सभा बोलाएर विधान संशोधनपछि नियुक्त गर्ने निर्णय भएको छ।
निवर्तमान महासचिव तथा नवनिर्वाचित सदस्य महेन्द्र प्रधानका अनुसार विधान संशोधनसँगै कार्यसमितिमा पदाधिकारी संख्या बढ्ने सम्भावना छ। त्यसपछि मात्र बाँकी पदाधिकारीको नाम टुंगो लाग्ने उनले बताए।
अध्यक्षद्वारा मनोनीत महासचिव खतिवडा उद्योग तर्फबाट र कोषाध्यक्ष आचार्य वाणिज्य तर्फबाट निर्वाचित भएका हुन्। असार ३० गते सम्पन्न निर्वाचनबाट अध्यक्षसहित २० सदस्य निर्वाचित भई श्रावण २६ गते पदस्थापन भएको थियो।
