सुनसरी/ उच्च अदालत विराटनगरले धरानस्थित महेन्द्र बहुमुखी क्याम्पसलाई एल.एल.बी. प्रथम वर्षका विद्यार्थी ईश्वर कट्टेललाई परीक्षा दिन अनुमति दिन उत्प्रेषणयुक्त परमादेश जारी गरेको छ।
बुधबार न्यायाधीश श्रीधरा कुमारी पुडासैनी र कृपासुर कार्कीको संयुक्त इजलासले कट्टेलले दायर गरेको रिट निवेदनमाथि सुनुवाइ गर्दै यस्तो आदेश जारी गरेको हो।
नियमित पठनपाठन गर्दै आएका कट्टेललाई क्याम्पसले परीक्षा फाराम बुझ्न अस्वीकार गरेको थियो।
क्याम्पसले उनी पूर्वाञ्चल विश्वविद्यालयबाट ल्याएको ‘माइग्रेसन सर्टिफिकेट’का कारण परीक्षा फाराम बुझ्न नपर्ने दाबी गरेको भए पनि अदालतले कानुनी आधार नदेखी परीक्षामा सहभागी गराउन आदेश दिएको हो।
यसअघि कट्टेलले साउन २१ गते क्याम्पस प्रमुख चन्द्रकुमार राईसहित त्रिभुवन विश्वविद्यालयका सम्बन्धित कार्यालयहरूलाई विपक्षी बनाएर रिट दायर गरेका थिए।
रिटमा निवेदकका तर्फबाट अधिवक्ता मुक्तिनाथ सुवेदीले बहस गरेका थिए भने विपक्षी तर्फबाट अधिवक्ता डा. नेवल चौधरी र वरिष्ठ अधिवक्ता गोविन्दमणि दाहालले बहस गरेका थिए।
