_1693980289.gif "#")
धरान/लाखेनाच जात्राको प्रवर्द्धन र संरक्षण गर्ने उद्देश्यले भोलि (बिहीबार) धरानको भानुचोकमा वृहत खुल्ला लाखेनाच प्रदर्शनी तथा प्रतियोगिता हुने भएको छ।
नेवाः देय् दबू धरान उपमहानगर समितिको आयोजनामा हुने कार्यक्रममा धरानभित्रका मात्र नभई बाहिरका लाखेनाच समूहको पनि सहभागिता रहनेछ।
आज (बुधबार) धरान–१६ स्थित हारती अजिमा मन्दिरमा आयोजित पत्रकार सम्मेलनमा आयोजक समितिले प्रदर्शनीलाई व्यवस्थित र मर्यादित बनाउन सबै लाखेनाच संस्था तथा समूहसँग सहकार्य गरिएको जानकारी दियो।
दबूका अध्यक्ष मनोहर शाक्यका अनुसार दिउँसो ४:३० बजेबाट भानुचोकमा सुरु हुने कार्यक्रमका लागि आवश्यक तयारी पूरा भइसकेको छ।
"मौसम प्रतिकूल भए पनि कार्यक्रम सफल बनाउन पूर्ण रूपमा तयार छौं," उनले भने।
गत वर्षको प्रदर्शनीमा १९ वटा लाखेनाच समूहले सहभागिता जनाएका थिए।
यस वर्ष पनि कम्तीमा १५ भन्दा बढी समूह सहभागी हुने अपेक्षा गरिएको छ। धरान बाहिरका नयाँ लाखे समूहले पनि भाग लिन सक्ने आयोजकको अनुमान छ।
प्रतियोगितामा प्रथम हुने समूहलाई नगद १५ हजार, द्वितीयलाई १० हजार र तृतीयलाई ५ हजार रुपैयाँसहित सम्मानपत्र प्रदान गरिनेछ।
अध्यक्ष शाक्यका अनुसार यो कार्यक्रम सांस्कृतिक पहिचानको संरक्षण मात्र नभई सामाजिक सद्भाव र सहअस्तित्वको सन्देश फैलाउने अभियान पनि हो।
