धरान/ धरान उपमहानगरपालिका–४ ढाँडे, तेलनपुरमा अवस्थित कन्या आधारभूत विद्यालय स्थानीय सरकारको प्राथमिकतामा पर्न नसकेको विद्यालय हो। नगरभित्रकै दुर्गम वडामा पर्ने यो विद्यालय अत्यन्तै विपन्न तथा न्यून आय भएका बालबालिकाको शिक्षाको आधार बनेको छ, तर यसको सञ्चालन अझै पनि सहयोगकै भरमा छ।
जम्मा २७ जना विद्यार्थी अध्ययनरत यस विद्यालयमा हुने–खाने परिवारका अभिभावक बसाइँसराइ गरेर महँगा निजी विद्यालय रोज्ने प्रवृत्तिका कारण विद्यार्थी संख्या घट्दै गएको छ। सरकारले उपलब्ध गराउने न्यून बजेटले विद्यालय चलाउन कठिनाइ भएपछि विभिन्न संघ–संस्था र व्यक्तिको सहयोग नै मुख्य आधार बनेको छ।
हालै, क्लोथ फाउन्डेशन धरानको पहलमा व्यवसायी अशोक अग्रवालले शैक्षिक सामग्री, खेलकुदका सामान र मादलसहितको लोकबाजा विद्यालयलाई हस्तान्तरण गरेका छन्। यसले शैक्षिक र अतिरिक्त क्रियाकलापमा ठूलो राहत पुगेको प्रधानाध्यापक तुफान मगरले बताए।
विद्यालय व्यवस्थापन समितिले पनि यो संस्थाको अस्तित्व सहयोगमै टिकेको भन्दै अझै निरन्तर सहयोगको आग्रह गरेको छ। क्लोथ फाउन्डेशनका संरक्षक लालबहादुर कार्कीले प्रदान गरिएका सामग्रीको सही सदुपयोग गर्न आग्रह गरे।
शिक्षा सुधारको जिम्मेवारी स्थानीय सरकारले लिएको भए पनि दुर्गम र आर्थिक रूपमा कमजोर समुदायमा रहेका सामुदायिक विद्यालयको अवस्था अझै दयनीय छ। यस्ता विद्यालयलाई दीर्घकालीन र पर्याप्त बजेटको व्यवस्था गरेर मात्र गुणस्तर सुधार सम्भव हुने सरोकारवालाहरूको धारणा छ।
