_बिकास चाम्लिङ राई
धरान/विद्यालयस्तरीय चौथो मेजर श्रवणकुमार मेमोरियल डिपो बास्केटबल रनिङ कप अन्तर्गतको फाइनल खेलमा सुनाखरी स्कुल धरान र प्याराडाइज स्कुल तरहराले स्थान सुरक्षित गरेका छन्।
आइतबार धरान–१६ स्थित इनडोर बास्केटबल कोर्टमा सम्पन्न सेमिफाइनल खेलमा सुनाखरी स्कुलले आइडल स्कुललाई ४८–३९ र प्याराडाइज स्कुलले कार्मेल हाई स्कुललाई ३९–३६ अंकले पराजित गर्दै फाइनलमा प्रवेश गरेका हुन्।
सुनाखरी र आइडल स्कुलबीचको खेलमा पहिलो क्वाटरमा आइडल ९–७ ले अघि रहेको थियो। तर दोस्रो क्वाटरमा सुनाखरीले २३–६ को फराकिलो अग्रता बनाउँदै लय समातेको थियो। तेस्रो क्वाटर १०–८ ले जितेपछि चौथोमा १६–८ ले पछि परे पनि कुल अंकमा अग्रता बनाउँदै सुनाखरीले जित निकाले।
त्यस्तै, प्याराडाइज र कार्मेलबीचको खेलमा पहिलो क्वाटर ६–६ को बराबरीमा सकिएको थियो। दोस्रो क्वाटरमा कार्मेलले ९–३ को अग्रता बनाए पनि तेस्रो क्वाटरमा प्याराडाइज १६–८ ले अघि बढ्यो। चौथो क्वाटर १५–१४ को बराबरी भए पनि अन्तिम नतिजामा प्याराडाइजले तीन अंकले अग्रता बनाउँदै जित दर्ता गर्यो।
प्रतियोगिताको पहिलो सेमिफाइनलमा सुनाखरीका बिक्रम श्रेष्ठ र दोस्रो सेमिफाइनलमा प्याराडाइजका प्रीन्स खत्री ‘म्यान अफ दी म्याच’ घोषित भए। उनीहरूलाई राष्ट्रिय रेफ्री युगल लिम्बू र आयोजक डिपो स्कुलका खेलकुद संयोजक उमेश ताम्रकारले ट्रफी प्रदान गरे।
कक्षा १० सम्मका विद्यार्थी सहभागी प्रतियोगितामा कुल १८ टिमले सहभागिता जनाएका थिए। विजेता टिमले नगद रु २०,०००, उपविजेताले नगद रु १०,०००, ट्रफी, मेडल र प्रमाणपत्र प्राप्त गर्नेछन्। ‘मोस्ट भ्यालुएबल प्लेयर’ (एमभीपी) ले रु १,०००, ट्रफी र प्रमाणपत्र, भने हाइ स्कोररले ट्रफी र प्रमाणपत्र प्राप्त गर्नेछ।
सुनसरी बास्केटबल संघ र धरान बास्केटबल संघको व्यवस्थापनमा प्रतियोगिता डिपो स्कुलको कोर्टमा सञ्चालन भइरहेको छ। फाइनल खेल सोमबार बिहान ८ बजे सुरु हुने आयोजकले जनाएको छ।
