धरान/ सुनसरीको बर्जु गाउँपालिकाको भित्री सडक खण्ड हुँदै अवैध रुपमा लागुऔषध गाँजा ओसारपसार हुँदै गरेको विशेष सूचनाका आधारमा प्रहरीले ठूलो मात्रामा गाँजा बरामद गरेको छ।
मिति २०८२ साल साउन १६ गते साँझ ७:४० बजे बर्जु गाउँपालिका–३, धत्ता टोल हुँदै कैसलिया खोला पार गर्दै विराटनगरतर्फ जाँदै गरेको को.२ ह. १५१४ नम्बरको अटोलाई प्रहरीले चेकजाँच गर्ने क्रममा अटो चालक प्रहरी टोलीलाई देखेपछि उखुबारीतर्फ भागेर फरार भएका थिए।
अटोमा चेकजाँच गर्दा पाँच वटा जेब्रा झोलामा लुकाइछिपाई राखिएको अवस्थामा गाँजा जस्तो देखिने १२८.४५ केजी (एक सय अठाइस किलोग्राम चार सय पचास ग्राम) पदार्थ फेला परेको इलाका प्रहरी कार्यालय दुहबीले जनाएको छ।
बरामद गरिएको गाँजासहित अटो नियन्त्रणमा लिइएको र हाल घटनाबारे थप अनुसन्धान भइरहेको प्रहरीले जनाएको छ। साथै फरार अटो चालकको खोजी कार्य जारी रहेको बताइएको छ।
