पारिवारिक विवादले लिए ज्यान : फालेलुङमा कोदालोको प्रहारबाट पत्नीको मृत्यु कोदालो प्रहारबाट श्रीमतीको मृत्यु

फिदिम/  पाँचथरको फालेलुङ गाउँपालिकामा एक युवकले कोदालो प्रहार गरी आफ्नै श्रीमतीको ज्यान लिएका छन्। श्रीमानको प्रहारबाट गम्भीर घाइते भएकी २२ वर्षीया अनु राईको उपचारका क्रममा निधन भएको हो।

पुलिसका अनुसार राईलाई उनका २७ वर्षीय श्रीमान् महेन्द्र तामाङले बुधबार राति कोदालोले प्रहार गरेका थिए। अनु राई फालेलुङ गाउँपालिका–७ आहाले घर भई हाल फिदिम नगरपालिका–१ नाम्दुस्थित माइतीमा बस्दै आएकी थिइन्।

जिल्ला प्रहरी कार्यालय पाँचथरका सूचना अधिकारी प्रहरी निरीक्षक रुपेश तामाङका अनुसार तामाङ ससुराली आएका बेला पारिवारिक विवादका क्रममा कोदालो प्रहार गरेका थिए।

कोदालोको पासोले लागेको घाउ गम्भीर रहेको राईलाई उपचारका लागि झापास्थित बिएण्डसि अस्पताल लगिएको थियो। उपचारकै क्रममा शुक्रबार बिहान उनको मृत्यु भएको प्रहरीले जनाएको छ।

घटनापछि फरार भएका तामाङलाई प्रहरीले फिदिम नगरपालिका–६ सिवाबाट लुकेर बसेको अवस्थामा पक्राउ गरेको छ। हाल उनलाई जिल्ला प्रहरी कार्यालयको हिरासतमा राखी अनुसन्धान थालिएको जनाइएको छ।