_1693980289.gif "#")
धरान /चर्चित गायक भिषण मुकारुङको दोस्रो एकल सांगीतिक साँझ यही भदौ २८ गते शनिबार धरानमा हुने भएको छ।
भोजपुर–सुनसरी सेवा समाजको आयोजनामा हुने उक्त कार्यक्रम धरान–१५ स्थित चुम्लुङ हिमको हलमा आयोजना गरिने आयोजकले मंगलबार पत्रकार सम्मेलनमार्फत जानकारी दिएको हो।
समाजका अध्यक्ष रेवतीरमण राईका अनुसार, सुविधायुक्त कार्यक्रम हलसहितको कार्यालय भवन निर्माणका लागि आवश्यक आर्थिक संकलन जुटाउने उद्देश्यले कार्यक्रम आयोजना गर्न लागिएको हो। उनका अनुसार, ‘कम्तीमा ५० लाख रुपैयाँ संकलन गर्ने लक्ष्य छ, कार्यक्रमको खर्च करिब १०–१२ लाख रुपैयाँ अनुमान गरिएको छ।’
सांगीतिक साँझका लागि ५ सयदेखि ५ हजारसम्मका दरका टिकट छापिएको छ। कुल ७८ लाख रुपैयाँ बराबरका टिकट सार्वजनिक गरिएको अध्यक्ष राईले जानकारी दिए।
२०७० सालमा स्थापना भएको भोजपुर–सुनसरी सेवा समाजले भोजपुरे समुदायलाई एकजुट गर्दै विभिन्न सामाजिक कार्यमा सक्रिय रहँदै आएको छ। हाल समाजमा एक हजारजना आजीवन सदस्य छन्।
गायक मुकारुङले यसअघि २०७९ सालमा काठमाण्डौमा पहिलो एकल सांगीतिक साँझ प्रस्तुत गरेका थिए। अढाई दशकदेखि सांगीतिक क्षेत्रमा सक्रिय गायक मुकारुङले यसपटकको साँझलाई आफ्ना २५ वर्षे सांगीतिक यात्राको संक्षिप्त सारको रूपमा प्रस्तुत गर्ने बताएका छन्।
पत्रकार सम्मेलनमा बोल्दै उनले भने, ‘यो साँझले मेरो २५ औं बसन्तसम्मको सांगीतिक अनुभव बोल्नेछ — एकमुष्ट प्याकेजमा।’ कार्यक्रममा आफ्ना चर्चित गीतहरूसँगै अग्रज कलाकारका गीतसमेत प्रस्तुत गरिने उनले जानकारी दिए।
गायक मुकारुङका “खोर्सानी डल्ले”, “ए सिम्मा”, जस्ता थुप्रै चर्चित गीत छन्, जसले देश, समाज र परिश्रमी जनताको कथा बोलेका छन्। उनले गीतलाई केवल मनोरञ्जनका लागि नभई समाज र देशसँग जोडिनुपर्ने सन्देशसमेत दिए।
