_1693980289.gif "#")
धरान/सुनसरीको धरान उप–महानगरपालिका–१५ स्थित ट्याटु हाउसको आडमा लुकेर सञ्चालन गरिएको लागू औषध कारोबार प्रहरीले भण्डाफोर गरेको छ।
विशेष सूचनाका आधारमा आईतवार साँझ ७:३५ बजे इलाका प्रहरी कार्यालय धरान र अस्थायी प्रहरी चौकी बरगाछीबाट संयुक्त रूपमा खटिएको प्रहरी टोलीले ट्याटु हाउसमा छापा मारेको हो।
धरान–१५ का ३७ वर्षीय योजन राईले सञ्चालन गरेको सो ट्याटु हाउसमा खानतलासी गर्दा लागू औषध ब्राउन सुगर ६८० मिलिग्राम पदार्थ, Tramadol १०५४ चक्का, Calero ९८५ चक्का र Decolmin ३४ चक्का बरामद गरिएको प्रहरीले जनाएको छ।
प्रहरीले घटनास्थलबाट योजन राईसहित ७ जनालाई नियन्त्रणमा लिएको छ। पक्राउ पर्नेहरूमा योजन राई (३७, धरान–१५), दिपेन मगर (२७), जगत मगर (२१), कृष्ण राई (३३), सुरज कार्की (३२), सोमत राई (२४, धरान–८) र असिम राई (१९) रहेका छन्।
उनीहरूमाथि लागू औषध सम्बन्धी कसूरमा थप अनुसन्धान भइरहेको इलाका प्रहरी कार्यालय धरानले जनाएको छ।
