_1693980289.gif "#")
सुनसरी/लागू औषध ओसारपसार भइरहेको विशेष सूचनाका आधारमा खटिएको प्रहरी टोलीलाई देख्नासाथ तस्करले ठूलो परिमाणको गाँजा फालेर मोटरसाइकलमै भागेका छन्।
मिति २०८२ साउन ९ गते राति ९:०० बजेको समयमा जिल्ला सुनसरीको देवानगञ्ज गाउँपालिका–३ स्थित खत्वे टोल नहर नजिक लागू औषध ओसारपसार भइरहेको खबर पाएपछि इलाका प्रहरी कार्यालय देवानगञ्जबाट टोली खटिएको थियो।
चेकजाँचको क्रममा देवानगञ्जबाट कप्तानगञ्जतर्फ गइरहेको नम्बर नखुलेको मोटरसाइकलले प्रहरी टोली देख्नेबित्तिकै पछाडि बोकेको २ वटा सेतो बोरा फालेर तीव्र गतिमा फरार भएको प्रहरीले जनाएको छ।
उक्त बोराहरू खोली जाँच गर्दा एक बोरामा रातो प्लास्टिकले बेरेका ३ पोका र अर्को बोरामा सेतो प्लास्टिकमा खुला अवस्थामा गाँजा लागू औषध फेला परेको थियो। बरामद पदार्थको तौल करिब ६० केजी रहेको प्रहरीको भनाइ छ।
बरामद गाँजा जिल्ला प्रहरी कार्यालय सुनसरीमा ल्याएर आवश्यक अनुसन्धान भइरहेको जनाइएको छ भने फरार मोटरसाइकल र चालकको खोजी कार्य तीव्र बनाइएको छ।
