_1693980289.gif "#")
इनरुवा/ सुनसरीको इनरुवामा आफूलाई प्रहरी बताउँदै सर्वसाधारणलाई धम्क्याएर रकम असुल गर्दै हिँडेका एक युवक पक्राउ परेका छन्। पक्राउ पर्ने व्यक्ति इनरुवा नगरपालिका–९ बस्ने ३० वर्षीय पवन मेहेता हुन्।
जिल्ला प्रहरी कार्यालय सुनसरीका अनुसार पवन मेहेता आफू सादा पोशाकमा खटिने प्रहरी हुँ भन्दै विगत केही दिनदेखि सर्वसाधारणलाई धाकधम्की दिँदै रकम असुल गर्दै आएका थिए।
उक्त गतिविधिको विशेष सूचनाका आधारमा साउन ८ गते बेलुकी ७ बजे अस्थायी प्रहरी पोष्ट पोखरीचोक र जिल्ला प्रहरी कार्यालय सुनसरीबाट खटिएको टोलीले उनलाई नियन्त्रणमा लिएको हो।
पवनलाई सुनसरीको भोक्राहा नरसिंह गाउँपालिका–५ चप्राहा क्षेत्रबाट को.१५ प.८८७ नम्बरको मोटरसाइकलसहित पक्राउ गरिएको प्रहरीले जनाएको छ। हाल पवन मेहेतालाई जिल्ला प्रहरी कार्यालय सुनसरीमा राखी थप अनुसन्धान जारी राखिएको छ।
