ईनरुवा/सुनसरीको ईनरुवामा धरानबाट लागुऔषध लिएर जादै गरेका तीन जना पक्राउ परेका छन्। मिति २०८२ साउन ८ गते दिउँसो ३:३० बजेको समयमा ईनरुवा नगरपालिका–४ बसपार्क नजिकै पूर्व–पश्चिम राजमार्गमा चेकजाँचका क्रममा उनीहरूलाई नियन्त्रणमा लिएको हो।
जिल्ला प्रहरी कार्यालय सुनसरी र अस्थायी प्रहरी पोस्ट बसपार्कबाट खटिएको संयुक्त प्रहरी टोलीले चिरौलिचोकबाट ईनरुवा आउँदै गरेको को.१ ह. ८९८८ नम्बरको अटोलाई रोकी चेकजाँच गर्दा अटो चालक धरान–८ निवासी २८ वर्षीय निलन लिम्बु र सवार धरान–६ का १७ वर्षीय कुलबहादुर लिम्बु तथा २४ वर्षीय युवराज लिम्बु पक्राउ परेका हुन्।
प्रहरीका अनुसार कुलबहादुर लिम्बुको साथबाट ब्राउन सुगर ३.८६ ग्राम लागूऔषध फेला परेको छ। लागूऔषधसहित अटो समेत नियन्त्रणमा लिइ अनुसन्धानका लागि जिल्ला प्रहरी कार्यालय सुनसरी ल्याइएको प्रहरीले जनाएको छ। यस सम्बन्धमा थप अनुसन्धान भइरहेको जनाइएको छ।
