धरान/ गोरु काटेर मासु खाएको आरोपमा प्रहरीले धरानबाट सात जनालाई पक्राउ गरेको छ। इलाका प्रहरी कार्यालय धरानका डीएसपी प्रकाश जवेगुका अनुसार पक्राउ पर्नेमा दुई महिला र पाँच पुरुष छन्।
पक्राउ पर्नेहरूको नाम सार्वजनिक नगरिएको प्रहरीले जनाएको छ। "अनुसन्धान जारी रहेकाले अहिल्यै नाम खुलाउन मिल्दैन, पछि सार्वजनिक गर्नेछौं," डिएसपी जवेगुले भने।
साँस्कृतिक अधिकार संरक्षण समितिले सोमबार आफ्नो १९औं स्थापना दिवस मनाइरहेका बेला प्रहरीले कार्यक्रम स्थलबाटै उनीहरूलाई नियन्त्रणमा लिएको हो। समितिले प्रत्येक वर्ष साउन ५ गते आदिवासी समुदायको परम्परागत संस्कारको संरक्षणको सन्देशसहित कार्यक्रम गर्दै आएको छ।
सोमबारको कार्यक्रममा समितिले “गोरु चिन्तन” पुस्तक र लेखक पत्रकार जनकऋषि राईलाई सम्मानसमेत गरेको थियो। कार्यक्रमका सहभागीहरूलाई गोरुको मासुको परिकार खुवाइएको थियो।
समितिले आदिवासी समुदायको परम्परागत अधिकार कुण्ठित भएको भन्दै गोरु काट्न पाउने अधिकारको माग गर्दै आएको छ। यसबारे थप अनुसन्धान भइरहेको प्रहरीले जनाएको छ।
