काठमाडौं/ देशका केही जिल्लामा सक्रिय मौसमी प्रणालीका कारण मौसम अस्थिर बनेको छ। मौसम पूर्वानुमान महाशाखाका अनुसार विशेषगरी कोशी, मधेश, गण्डकी र कर्णाली प्रदेशका केही भूभागमा मेघगर्जन, चट्याङ र हावाहुरीसहित हल्कादेखि मध्यम वर्षा भइरहेको छ।
कोशी प्रदेश, मधेशको पूर्वी भू–भाग, गण्डकीको स्याङ्जा, बागलुङ, कास्की र कर्णाली प्रदेशको जाजरकोट, सुर्खेत, डोल्पा र सिमिकोट आसपासका क्षेत्रमा मौसमी प्रभाव उच्च देखिएको हो।
महाशाखाले दिएको जानकारीअनुसार हाल सक्रिय मौसमी प्रणाली क्रमशः दक्षिण–पश्चिमतर्फ सर्दै गएको छ। यसका कारण प्रभावित जिल्लासँगै आसपासका क्षेत्रमा समेत आगामी केही घण्टासम्म मौसम झन् अस्थिर रहने सम्भावना रहेको छ।
यसैबीच, महाशाखाले ती क्षेत्रका बासिन्दालाई बाढी, पहिरो र चट्याङको जोखिमलाई ध्यानमा राख्दै आवश्यक सतर्कता अपनाउन आग्रह गरेको छ। नदी किनार र पहिरो संभावित क्षेत्रबाट टाढा रहन, यात्रामा निस्कँदा सावधानी अपनाउन र मौसमसम्बन्धी नियमित जानकारी लिन समेत सुझाव दिइएको छ।
