धरान/ समयमै पानी नपाएपछि धरानका किसानले धान रोप्न पाएका छैनन । धान रोप्न नपाउँदा रोप्नका लागि राखेको विउ समेत सुक्न थालेको छ । पानी नपरेर लामो खडेरीका कारण मुख्य खाद्यबाली धान रोप्न नपाउँदा किसान चिन्तित छन् ।
हल्का फाट्ट फुट्ट बर्षा बाहेक अधिकांश भागमा पानी नपर्दा गर्मी ह्वात्तै बढेको छ ।
यो समस्या धरानका कृषकको मात्र होइन, पूर्वी तराईमै खडेरी भइरहेको किसानहरूले बताएका छन् । अषाढको अन्तिमसम्म धान रोपिसक्ने भएपनि बर्षाद् नभएकोले शुरुवात नै गर्न नपाइएको धरान ६ का कृषक बृद्धिमान तामाङको भनाई छ ।
धरान ६ पानबारी कृषि पकेट क्षेत्रको रुपमा धरान उपमहनगरपालिकाले लिएको छ । यहाँ उत्पादन भएको बाली तथा सागसब्जी धरान तथा धरान आसपाससम्म जाने गरेको छ ।
कहीँ बाढीले कुनै पुल पुलेसा बगाइरहेको अवस्थामा पूर्वमा भने पानी नपर्दा कृषकहरुले समयमै धान रोप्न नपाएको मात्र हैन कृषककका लागि सरकारले मल विउ समयमै उपलब्ध नगराउदा समस्या हुने गरेको धरान ६ का अर्का कृषक दानबहादुर कुरुम्बा बताउछन् ।
कृषकले धान खेती रोप्न मात्र नपाएका होइन, खेतबारीमा लगाएको खुर्सानी, गोलभेंडा, प्याज, फर्सी, काक्रो, सिमीबोडी लगायतका बाली घामबाट जोगाउन मुस्किल हुने गरेको छ ।
तामाङ र कुरुम्बा मात्र हैन कृषि पकेट धरानको कृषि पकेट क्षेत्रभित्र रहेको ४, ५ र ६ का कृषहरुले समयमै बर्षाद नहुदा समस्या भोगेका छन् । मानो रोपेर मुरी उमार्ने मुख्य सिजनमै पानी नपरेपछि कृषि पकेट क्षैत्रका कृषकहरु चिन्तित बनेका छन् ।
यस बर्ष खडेरीले धान उत्पादनमा समेत कमी हुने कृषकहरु बताउँछन् ।
