_1693980289.gif "#")
धरान/ सुनसरीको बराहक्षेत्र नगरपालिकाले स्थानीय उत्पादनको ढुवानी सहज बनाउन व्यवसायिक कृषकलाई ५० प्रतिशत अनुदानमा विद्युतीय ढुवानी साधन ‘सिटी सफारी’ हस्तान्तरण गरेको छ।
नगरपालिकाको कृषि विकास शाखाले आर्थिक वर्ष २०८१/८२ को वार्षिक कार्ययोजनाअनुसार चार जना व्यवसायिक कृषक तथा कृषि संस्थालाई सिटी सफारी वितरण गरेको हो।
शाखा प्रमुख तुलसा लिम्बूका अनुसार प्रत्येक सिटी सफारीको लागत ४ लाख २० हजार रुपैयाँ पर्ने भए पनि कृषकले त्यसको मात्र २ लाख १० हजार तिर्ने छन् भने बाँकी रकम नगरपालिकाले व्यहोरेको छ।
सिटी सफारी वितरणबाट स्थानीय कृषकको समय, श्रम र ढुवानी लागत घट्ने, ताजा उत्पादनको मूल्य जोगिने र बजारसम्म सजिलो पहुँच कायम हुने अपेक्षा गरिएको छ।
यसपटक पृतिचन माझी, बिष्ट कृषि फार्म, नवदुर्गा कृषि सहकारी संस्था र दाजुभाइ कृषि फार्म अनुदान प्राप्त समूहमा परेका छन्।
वितरण कार्यक्रम नगरपालिकाकी उपप्रमुख नन्दकुमारी सुनुवार, प्रमुख प्रशासकीय अधिकृत गणेशबहादुर कटुवाल र आर्थिक विकास संयोजक तेजबहादुर गुरुङको उपस्थितिमा सम्पन्न भएको थियो।
बिष्ट कृषि फार्मका प्रतिनिधि अर्जुन बिष्टले भने, “हामीलाई सबैभन्दा ठूलो चुनौती खेतको उत्पादन बजारसम्म पुर्याउनु हो, अब ढुवानी सजिलो हुनेछ र नोक्सानी पनि घट्नेछ।”
कृषि शाखा प्रमुख लिम्बूले आगामी वर्षहरूमा यस्ता कार्यक्रमलाई थप विस्तार गर्ने योजना रहेको बताउँदै भनिन्, “स्थानीय उत्पादनलाई प्रोत्साहन गर्दै कृषकको जीवनस्तर उकास्न हामी यस्ता कार्यक्रमलाई प्राथमिकता दिइरहेका छौँ।”
