-फाइल तस्बिर
काठमाडौँ/ पाकिस्तानको खैबर पख्तुन्ख्वा प्रान्तमा भएको आत्मघाती आक्रमणमा १३ जना पाकिस्तानी सैनिकको मृत्यु भएको छ।
मीर अली क्षेत्रमा उग्रवादीले सुरक्षा बलको समूहलाई लक्षित गरी विस्फोटक पदार्थले भरिएको गाडीमार्फत आक्रमण प्रयास गरेको बीबीसी हिन्दीले पाकिस्तानी सेनाको इन्टर–सर्भिसेज पब्लिक रिलेसन्स (ISPR) लाई उद्धृत गर्दै जनाएको छ।
आत्मघाती गाडी सुरक्षा बलको गाडीसँग ठोक्किएपछि भीषण विस्फोट भएको र घटनास्थलमै १३ सैनिकको ज्यान गएको बताइएको छ।
प्रहरी र सेनाले घटनापछि तत्कालै उग्रवादीमाथि जवाफी कारबाही थालेका थिए। त्यस क्रममा सुरक्षाकर्मी र उग्रवादीबीचको भिडन्तमा १४ जना उग्रवादी मारिएको ISPR ले जनाएको छ।
खैबर पख्तुन्ख्वाका मुख्यमन्त्रीले वक्तव्य जारी गर्दै घटनामा ज्यान गुमाएका सुरक्षाकर्मीप्रति श्रद्धाञ्जली र परिवारजनप्रति सहानुभूति प्रकट गरेका छन्। उनले देशमा शान्ति स्थापना र आतंकवाद विरुद्ध सुरक्षाकर्मीले दिएको बलिदान अभूतपूर्व रहेको उल्लेख गरेका छन्।
