सुनसरी/ विशेष सूचनाको आधारमा प्रहरीले धरानबाट कालाबन्जार तर्फ जाँदै गरेको कार नियन्त्रणमा लिँदै ठूलो परिमाणमा लागू औषध गाँजा बरामद गरेको छ।
मिति २०८२ साल असार १४ गते साँझ ७:३० बजेको समयमा, सुनसरीको बराहक्षेत्र नगरपालिका–५ तिनकुनेस्थित प्रहरीले उक्त कारवाही गरेको हो। प्रहरी चौकी भरौलबाट खटिएको टोलीले धरानबाट आउँदै गरेको टाटा कम्पनीको नानो कार (प्रदेश १–०२–००१ ज. ४६३७) लाई रोकजाँच गरेको थियो।
त्यसपछि इलाका प्रहरी कार्यालय महेन्द्रनगर र अस्थायी प्रहरी चौकी नहडाबाट थप टोली खटाई कारमा चेकजाँच गर्दा, कालो प्लास्टिकका ६ वटा बोरामा प्याक गरिएको लागू औषध गाँजा जस्तो देखिने करिब १२० किलो पदार्थ फेला परेको हो।
साथै, प्रहरीले सोही कारका चालक मोरङ, विराटनगर महानगरपालिका–४, इक्राहीका २६ वर्षीय धिरज गोसाई र सहयात्री मोरङ, जहदा गाउँपालिका–७ निवासी २२ वर्षीय बिकास यादवलाई नियन्त्रणमा लिएको छ।
हाल उनीहरूलाई आवश्यक अनुसन्धानका लागि इलाका प्रहरी कार्यालय महेन्द्रनगरमा राखिएको छ। लागू औषध नियन्त्रणमा प्रहरीले सक्रियता बढाएको जनाएको छ।
