इटहरीमा लागू औषध ब्राउन सुगरसहित दुई जना पक्राउ

इटहरी/ सुनसरीको इटहरी उप–महानगरपालिका–५ स्थित शिवालय टोलमा प्रहरीले लागू औषध ब्राउन सुगरसहित दुई जनालाई पक्राउ गरेको छ।

मिति २०८२ साल असार १२ गते राति १०:४० बजेको समयमा विशेष सूचनाको आधारमा अस्थायी प्रहरी चौकी जनताबस्तीबाट खटिएको प्रहरी टोलीले नन्दलाल बि.क.को घरमा छापा मार्दा लागू औषध लुकाइछिपाई राखेको अवस्थामा फेला पारेको हो।

प्रहरीले नन्दलाल बि.क.को छोरा ३४ वर्षीय प्रकाश बि.क. र उनीसँगै बस्दै आएका जिल्ला उदयपुर, बेलका नगरपालिका–४ घर भई सोही स्थानमा डेरा गरी बसेका ३१ वर्षीय दिनेश आलेलाई पक्राउ गरेको हो।

उनीहरूले प्रयोग गर्दै आएको कोठाबाट कालो प्लास्टिकमा पोको पारी लुकाइएको लागू औषध ब्राउन सुगर जस्तो देखिने पदार्थ १.६४ ग्राम (एक ग्राम छ सय चालिस मिलिग्राम) फेला पारिएको इलाका प्रहरी कार्यालय इटहरीले जनाएको छ।

पक्राउ परेकाहरूलाई आवश्यक अनुसन्धानका लागि इलाका प्रहरी कार्यालय इटहरीमा ल्याइएको र घटनासम्बन्धी थप अनुसन्धान भइरहेको प्रहरीले जनाएको छ।