_1693980289.gif "#")
उदयपुर/ उदयपुरको चौदण्डीगढी नगरपालिका–४ अमलचौरीमा एक किशोरी र एक युवक मृत अवस्थामा फेला परेका छन् ।
घटना हत्या हो कि आत्महत्या भन्नेबारे अनुसन्धान जारी रहेको प्रहरीले जनाएको छ ।
जिल्ला प्रहरी कार्यालय उदयपुरका अनुसार, स्थानीय १४ वर्षीया मञ्जु राईको शव बुधवार बिहान सडक छेउमा लडिरहेको अवस्थामा भेटिएको हो । सोही स्थानबाट करिब २ सय मिटर पर आँपको रुखमा २८ वर्षीय रवीन्द्र राई झुन्डिएको अवस्थामा फेला परेका हुन् ।
इलाका प्रहरी कार्यालय बेल्टारका प्रहरी निरीक्षक बविन राईका अनुसार घटनास्थलमा पुगेर दुवै शवको कानुनी प्रक्रिया पूरा गरी पोष्टमार्टमको तयारी भइरहेको छ ।
‘अहिलेसम्म घटनाको यकिन कारण खुल्न बाँकी छ, अनुसन्धान भइरहेको छ,’ उनले जानकारी दिए ।
प्रहरीले प्रारम्भिक अनुसन्धानका आधारमा मञ्जुको शरीरमा नीलडाम र घाँटीमा चोट देखिएको जनाउँदै हत्या–आत्महत्याको आशंका गरेको छ । उनीहरूबीच केही समयदेखि प्रेम सम्बन्ध रहेको र पछिल्लो समय खटपट भइरहेको स्थानीयले बताएका छन् ।
मृतक मञ्जु सिंहदेवी माविमा कक्षा १० मा अध्ययनरत थिइन् भने रवीन्द्र केही दिनअघि मात्र काठमाडौँबाट गाउँ फर्किएका थिए । उनीहरू एकै गाउँका छिमेकी हुन् र पुरानै चिनजान रहेको खुलेको छ ।
बिहानै स्थानीयले बाटोमा किशोरीको शव देखेपछि प्रहरीलाई खबर गरेका थिए । त्यसपछि खोजतलास गर्ने क्रममा नजिकै युवकको शव समेत भेटिएको हो ।
जिल्ला प्रहरी कार्यालय उदयपुरका सूचना अधिकारी प्रहरी नायब उपरीक्षक केदारमान दोङका अनुसार, ‘यो घटना प्रेम सम्बन्धकै कारण हो वा अरु कुनै कारण पनि जोडिएको छ भन्नेबारे गहिरो अनुसन्धान भइरहेको छ ।’
_Poush 22_1736170149.jpg "#")