इटहरी/धरानबाट इटहरीतर्फ आउँदै गरेका दम्पती सवार मोटरसाइकल मंगलबार दिउँसो इटहरी उपमहानगरपालिका–२० स्थित सेउती पुल नजिक दुर्घटना हुँदा श्रीमतीको मृत्यु भएको छ भने श्रीमान् गम्भीर घाइते भएका छन्।
प्रदेश १–०२–०५२ प ३५६४ नम्बरको पल्सर मोटरसाइकल दिउँसो करिब ३ः३५ बजे अनियन्त्रित भई कोशी लोकमार्गमा पल्टिएको थियो।
दुर्घटनामा धनकुटा पाख्रिबास नगरपालिका–४ स्थायी घर भई हाल इटहरी–१ हासँपोसा बस्दै आएका ५३ वर्षीय राजेन्द्र श्रेष्ठ गम्भीर घाइते भएका छन्। मोटरसाइकलमा पछाडि सवार उनकी ४५ वर्षीया पत्नी हिरा मेघा गम्भीर घाइते भई बेहोस अवस्थामा भेटिएकी थिइन्।
अनुहारमा गम्भीर चोट लागेपछि उनलाई तत्काल विराटनगरस्थित आर्य न्युरो अस्पताल पुर्याइएको थियो। उपचारका क्रममा मंगलबार साँझ नै उनको मृत्यु भएको प्रहरीले जनाएको छ।
दुर्घटनाबारे थप अनुसन्धान भइरहेको इलाका प्रहरी कार्यालय इटहरीका प्रहरी सहायक निरीक्षक कमल प्रसाद घिमिरेले जानकारी दिएका छन्।
