-साङ्केतिक तस्बिर
ईनरुवा/ सुनसरीको ईनरुवामा ब्राउन सुगरसहित दुई जना पक्राउ परेका छन्।
बिहिबार राति १०ः३० बजेको समयमा ईनरुवा नगरपालिका–४ स्थित बसचौक नजिक पूर्व–पश्चिम राजमार्गमा लागूऔषध ओसारपसार भइरहेको विशेष सूचनाका आधारमा जिल्ला प्रहरी कार्यालय सुनसरी र अस्थायी प्रहरी चौकी बसपार्कबाट खटिएको संयुक्त टोलीले चेकजाँचका क्रममा स्कुटरमा लागूऔषध फेला पारेको हो।
पश्चिमबाट पूर्वतर्फ गइरहेको बा.प्र.०२–०५२ प ७७५७ नम्बरको स्कुटर चेकजाँच गर्दा डिक्कीभित्र प्लास्टिकमा पोका पारेर राखिएको अवस्थामा ब्राउन सुगर जस्तो देखिने लागूऔषध २७.९२ ग्राम फेला परेको प्रहरीले जनाएको छ।
लागूऔषधसहित सिन्धुलीको दुधौली नगरपालिका–१० का ३३ वर्षीय अर्जुन कटुवाल र उदयपुरको कटारी नगरपालिका–२ का ३३ वर्षीय सुमन माझीलाई पक्राउ गरिएको छ।
उनीहरूलाई नियन्त्रणमा लिएर जिल्ला प्रहरी कार्यालय सुनसरीमार्फत थप अनुसन्धान भइरहेको प्रहरीले जनाएको छ।
