झापामा छुट्टाछुट्टै स्थानमा तीन पुरुष मृत फेला

बिर्तामोड/  झापामा छुट्टाछुट्टै स्थानमा तीन पुरुष मृत अवस्थामा फेला परेका छन्। बिर्तामोड र अर्जुनधारा नगरपालिकाका विभिन्न स्थानमा ती पुरुषको शव फेला परेको जिल्ला प्रहरी कार्यालय झापाले जानकारी दिएको छ।

मंगलबार बिर्तामोड नगरपालिका–२, फुलवारी टोलस्थित पासाङ शेर्पाको मकैबारीमा बिर्तामोड–२ आदर्श टोलका अन्दाजी ३६ वर्षीय राम टुडु मृत अवस्थामा फेला परेका थिए। घोप्टो अवस्थामा भेटिएका टुडुको शवमा कुनै बाह्य चोटपटक नदेखिएको र मृत्युको कारण खुल्न नसकेको प्रहरीले जनाएको छ।

यसैगरी, बुधबार बिहान अर्जुनधारा नगरपालिका–४, मदनपुरस्थित जलाधर भित्री कच्ची सडकमा अन्दाजी ४५–५० वर्ष उमेरका पुरुष मृत फेला परेका छन्। उनको सनाखत भइनसकेको प्रहरीले जनाएको छ।

त्यस्तै, मंगलबार अर्जुनधारा नगरपालिका–११ नयाँबस्तीस्थित चियाबगानभित्र सोही स्थानका अन्दाजी ६० वर्षीय मित्रलाल कामी मृत अवस्थामा फेला परेका थिए। उनी लडेको अवस्थामा भेटिएको र घटनाको अनुसन्धान भइरहेको प्रहरीले जनाएको छ।

तीनवटै घटनाबारे जिल्ला प्रहरी कार्यालय झापाले आवश्यक अनुसन्धान भइरहेको जानकारी दिएको छ।