काठमाडौं/ पतञ्जलीको जग्गा सट्टापट्टा प्रकरणमा अख्तियार दुरुपयोग अनुसन्धान आयोगले भ्रष्टाचार मुद्दा दायर गरेसँगै एकीकृत समाजवादीका अध्यक्ष तथा पूर्वप्रधानमन्त्री माधवकुमार नेपालको सांसद पद निलम्बनमा परेको छ।
अख्तियारले बिहीबार नेपालसहित १२ जनाविरुद्ध भ्रष्टाचारको आरोपसहित विशेष अदालतमा मुद्दा दायर गरेपछि प्रतिनिधिसभाका सांसदसमेत रहेका पूर्वप्रधानमन्त्री नेपालको पद स्वतः निलम्बनमा परेको हो।
नेपालको इतिहासमा पहिलोपटक कुनै पूर्वप्रधानमन्त्रीमाथि भ्रष्टाचार मुद्दा दायर भएको हो। साथै, मन्त्रिपरिषद्को निर्णयका आधारमा भ्रष्टाचार मुद्दा चलेको पनि पहिलोपटक हो।
पूर्वप्रधानमन्त्री नेपाल प्रधानमन्त्री रहँदा मन्त्रिपरिषद् बैठकमार्फत पतञ्जली समूहलाई जग्गा सट्टापट्टा गरी अवैध रूपमा लाभ दिएको आरोपमा आयोगले अनुसन्धान अघि बढाएको थियो। सोही निर्णयका कारण राज्यलाई नोक्सान पुगेको ठहर गर्दै मुद्दा दायर गरिएको आयोगले जनाएको छ।
यस प्रकरणले राजनीतिक वृत्तमा तरंग ल्याएको छ भने कानुनी र संवैधानिक पक्षमा समेत बहस सुरू भएको छ।
