झापा/ झापाको दमकमा एक व्यक्तिले श्रीमतीलाई खोकीको औषधिको बहानामा विष खुवाएर हत्या प्रयास गरेको आरोपमा पक्राउ परेका छन्।
पक्राउ पर्ने व्यक्ति सप्तरी शम्भुनाथ नगरपालिका–२ घर भई हाल दमक–१ सुम्निमा टोलमा डेरा गरी बस्दै आएका २५ वर्षीय दिलीपकुमार मरिक डोम हुन्।
जिल्ला प्रहरी कार्यालय झापाका अनुसार, गत चैत १० गते बिहान ८ बजे डोमले आफ्नी श्रीमती रेनु मरिकलाई ‘कफ सिरप’ भन्दै विष खुवाउन खोजेका थिए। विष सेवन गराएर ज्यान लिन खोजिएको रेनुको बयानलाई उद्धृत गर्दै इलाका प्रहरी कार्यालय दमकका डीएसपी रामप्रसाद तिम्सिनाले भने, "यसअघि पनि श्रीमानले उनलाई आगो लगाएर मार्न खोजेको बयान रेनुले दिएकी छिन्।"
दम्पतीका एक छोरा र एक छोरी छन्। घटना पछि फरार रहेका डोमलाई इलाका प्रहरी कार्यालय दमक र कल्याणपुर (सप्तरी) बाट खटिएको संयुक्त प्रहरी टोलीले आइतबार सप्तरीको कल्याणपुरबाट पक्राउ गरेको हो।
हाल उनीमाथि ज्यान मार्ने उद्योग अन्तर्गत अनुसन्धान भइरहेको जिल्ला प्रहरी कार्यालय झापाका डीएसपी खगेन्द्र बहादुर खड्काले जानकारी दिए। अदालतबाट ५ दिनको म्याद थप गरिएको छ।
