धरानजस्तो सहरमा बाँसको पुल! जोखिम मोलेर यात्रा गर्न बाध्य देउरालीबासी

धरान/ पूर्वी नेपालकै सुन्दर र विकसित सहर मानिने धरान उपमहानगरपालिकाको मुटुमा पर्ने देउराली क्षेत्रका बासिन्दा अझै पनि बाँसको कच्ची पुलमार्फत जोखिम मोलेर आवतजावत गर्न बाध्य छन्।

धरान उपमहानगरपालिका वडा नम्बर ५ अन्तर्गत पर्ने देउराली, आँपटार र ठिंगाबारीका स्थानीयले वर्षायाम सुरु भएसँगै निशाने खोलामा आउने बाढीका कारण बाँसको अस्थायी पुल निर्माण गरेका हुन्। खोला पार नगरी धरान बजारसम्म पुग्न नसकिने अवस्था भएपछि उनीहरूले यो जोखिमपूर्ण विकल्प रोज्नुपरेको हो।

"धरानजस्तो ठाउँमा वर्षेनी हामी बाँसको पुल बनाउँदै हिँड्नुपर्छ भन्ने कुरो आफैंमा लाजमर्दो हो," एक स्थानीयले आक्रोश पोखे, "शहरमा सडक, भवन र लाइट छन्, तर हाम्रो गाउँमा हिँड्न पुल छैन!"

प्रत्येक वर्ष वर्षा सुरु भएलगत्तै खोलामा बाढी आउँछ, जसका कारण विद्यार्थीदेखि वृद्धबृद्धासम्मका मानिस जोखिम मोलेर सानो, चिप्लो र अस्थायी बाँसको पुलबाट ओहोरदोहोर गर्न बाध्य छन्। विद्यार्थीहरू विशेष गरी वर्षायाममा विद्यालय जानबाट बञ्चित हुन थालेका छन्।

स्थानीय सरकारको ‘स्मार्ट सिटी’ भनिने योजनाहरूको सन्दर्भमा यस्तो अवस्थाले धरानको विकासको बास्तविकता औंल्याउने काम गरेको छ।

देउरालीका बासिन्दाले स्थायी पुलको माग गर्दै बारम्बार ध्यानाकर्षण गराएका भए पनि अझसम्म कुनै दीर्घकालीन योजना बन्न सकेको छैन।

"हामीलाई सडक हैन, अहिले पुल चाहिएको छ," अर्का एक स्थानीयले भने।

धरान उपमहानगरपालिका र सम्बन्धित सरकारी निकायको ध्यान पुगोस् भनेर स्थानीयहरूले बनाएको यो बाँसको पुल केवल आवतजावतको साधन मात्र नभएर विकासको नालिबेली झल्काउने ऐना पनि बनेको छ।

— कोशीपत्रले गरेकाे स्थलगत भिडियो रिपोर्ट हेर्नुस: