यात्रुवाहक गाडीमा गाँजा! भेडेटारमा ५१ किलो लागुऔषधसहित महिला समातिइन्

धनकुटा/ धनकुटाको भेडेटार चोकमा प्रहरीले बिहीबार बिहान सार्वजनिक सवारीसाधनमार्फत तस्करी गरिँदै गरेको ५१ किलो गाँजा बरामद गरेको छ।

लागुऔषध नियन्त्रण अभियानअन्तर्गत इलाका प्रहरी कार्यालय भेडेटारबाट खटिएको टोलीले नियमित जाँचका क्रममा गाँजा बरामद गरेको हो।

तेह्रथुमबाट इटहरीतर्फ गइरहेको प्र.१–०२–००१ ज ४४८० नम्बरको यात्रुवाहक ईभी गाडी जाँच गर्दा छतमा राखिएको एक जेब्रा झोला र दुईवटा बोरामा लुकाइराखिएको अवस्थामा ठूलो परिणाममा गाँजा भेटिएको धनकुटा प्रहरीले जनाएको छ।

घटनास्थल साँगुरीगढी गाउँपालिका–६ को भेडेटार चोकमा बिहान करिब ९ बजे उक्त गाडीलाई रोकेर चेकजाँच गर्दा ५१ किलो गाँजा फेला परेको हो।

प्रहरीका अनुसार, गाँजासहित पक्राउ परेकी महिला धनकुटा जिल्ला, शहीदभूमि गाउँपालिका–७ की २६ वर्षीया लक्ष्मी राई हुन्। साथै, गाडीका चालक तेह्रथुम म्याङलुङ नगरपालिका–७ का ३७ वर्षीय प्रकाश गुरुङलाई पनि नियन्त्रणमा लिई अनुसन्धान थालिएको छ।

बरामद गरिएको गाँजाको स्रोत, गन्तव्य र यसमा संलग्न अन्य व्यक्तिहरूको पहिचानका लागि अनुसन्धान जारी रहेको प्रहरी स्रोतको भनाइ छ।