_1693980289.gif "#")
बनियानी/ झापाको हल्दिबारी गाउँपालिकाको वडा नं ५ र १ जोड्ने भुतेनी खोलामा निर्माण सम्पन्न गरिएको पक्की पुलको आज औपचारिक उद्घाटन गरिएको छ।
राष्ट्रिय प्रजातन्त्र पार्टीका अध्यक्ष तथा संघीय सांसद राजेन्द्र लिङ्देनले उद्घाटन समारोहमा बोल्दै जनप्रतिनिधिमा सपना, योजना र इमान्दारी भए विकासमा कुनै पनि अवरोध आउन नदिने बताए।
“हल्दिबारीले यहाँको सर्वाङ्गीण विकासमा जुन फड्को मारेको छ, म त्यसका लागि सबैलाई बधाइ दिन्छु,” सांसद लिङ्देनले भने।
हल्दिबारी गाउँपालिका अध्यक्ष रवीन्द्र लिङ्देनका अनुसार हालसम्म गाउँपालिकाभित्र एक सय ५० काठेपुल विस्थापित गर्दै पक्की पुल तथा कल्भर्ट निर्माण गरिएका छन्। यस्तै, भुसुडी खोलामा थप दुईवटा पुल पनि निर्माणको अन्तिम चरणमा पुगेको जानकारी दिइयो।
कार्यक्रममा नेपाल कम्युनिष्ट पार्टी (एमाले) हल्दिबारी अध्यक्ष त्रिलोचन सपाकोटाले कम लागतमा र तोकिएको समयमा पुल निर्माण हुनु सकारात्मक उपलब्धि भएको बताए। उनले गाउँपालिकाले कुनै राजनीतिक पूर्वाग्रह नराखी नयाँ तथा पुराना योजनाहरू सञ्चालन गरिरहेको र आफ्नै बजेटमा यस्तो आयोजना सम्पन्न गर्नु गौरवको विषय भएको उल्लेख गरे।
गाउँपालिकाका प्रमुख प्रशासकीय अधिकृत मानबहादुर वन (महेन्द्र) का अनुसार भुतेनी खोलाको पुलसहित भुसुडी खोलाका दुई पुलको कुल लागत चार करोड ९६ लाख ८५ हजार ९२८ रुपैयाँ परेको छ।
भुतेनी खोलामा उद्घाटन गरिएको पुलको लागत मात्रै दुई करोड ३० लाख रुपैयाँ रहेको छ। पुलको लम्बाइ ४२.७ मिटर र चौडाइ ७.२ मिटर रहेको छ।
सारा सृष्टि निर्माण सेवा प्रालिले पुल निर्माणको जिम्मा लिएको थियो। गाउँपालिकाले २०७९ मङ्सिर ७ गते दुई वर्षभित्र निर्माण सम्पन्न गर्ने गरी कम्पनीसँग सम्झौता गरेको थियो।
पुल निर्माणसँगै वडा नं ५ र १ का हजारौं स्थानीयवासी प्रत्यक्ष लाभान्वित भएका छन्। योजना शाखा प्रमुख राजन न्यौपानेका अनुसार अब हल्दिबारी–१ का बासिन्दाको गाउँपालिका केन्द्रसँग सिधा सम्पर्क कायम भएको छ।
साथै, वर्षायाममा आवतजावतमा कठिनाइ भोगिरहेका नजिकैको धनुषा आधारभूत विद्यालयका विद्यार्थीहरूलाई समेत सहज भएको छ।
