नेतृत्वविहीन बीपी प्रतिष्ठान: भागबन्डा मिलाउन नसक्दा प्रतिष्ठानको शैक्षिक भविष्य अन्योलमा

धरान/ धरानस्थित बीपी कोइराला स्वास्थ्य विज्ञान प्रतिष्ठानमा एक महिनाभन्दा बढी समयदेखि उपकुलपति नियुक्त नहुँदा संस्थाको सञ्चालन अस्थायीत्वको अवस्थामा पुगेको छ।

राजनीतिक भागबन्डा मिलाउन नसक्दा नयाँ नेतृत्व चयन प्रक्रिया अघि बढ्न नसकेको हो।

गत चैत २७ गतेदेखि उपकुलपति पद रिक्त भएपछि प्रतिष्ठानको नेतृत्व कार्यवाहक रूपमा डा. सञ्जीव शर्माले सम्हालिरहेका छन्।

तर निमित्त नेतृत्वले दीर्घकालीन योजना, बजेट निर्माण, अन्तर्राष्ट्रिय सहकार्य र गुणस्तरीय सेवा प्रवाहमा प्रभावकारी भूमिका निर्वाह गर्न नसकेको भन्ने गुनासो कर्मचारी र सरोकारवालाबाट उठिरहेको छ।

स्वास्थ्य तथा जनसंख्या मन्त्रालय मातहत रहेका चारवटा स्वास्थ्य विज्ञान प्रतिष्ठानमध्ये बीपी कोइराला प्रतिष्ठान अत्यन्तै महत्त्वपूर्ण मानिन्छ। यस्तो संस्थामा पूर्णकालीन नेतृत्व नहुँदा नीति निर्माण, शैक्षिक सुधार र सेवा विस्तारमा अवरोध देखिएको छ।

स्वास्थ्य मन्त्रालयका प्रवक्ता डा. प्रकाश बुढाथोकीले भने, “उपकुलपति नियुक्तिका लागि प्रक्रिया चाँडै अघि बढाइने तयारी छ।” तर मन्त्रालय स्रोतका अनुसार सत्तारूढ गठबन्धनबीच पदको भागबन्डा मिल्न नसक्दा प्रक्रिया अगाडि बढ्न सकेको छैन।

स्वास्थ्य शिक्षा क्षेत्रका विज्ञहरूका अनुसार निमित्त नेतृत्वको कार्यकाल अनिश्चित हुने भएकाले रणनीतिक र दीर्घकालीन निर्णयहरूमा हिचकिचाहट देखिन्छ।

उनीहरू भन्छन्, "स्थायीत्वविनाको संस्थामा नीति र कार्यक्रम कार्यान्वयन कमजोर हुन्छ।"

उपकुलपति नियुक्तिमा भइरहेको ढिलाइले न केवल प्रशासनिक स्थायित्वमा असर पारेको छ, स्वास्थ्य शिक्षाको गुणस्तर, अनुसन्धान तथा सेवा प्रवाहमा समेत चुनौती थपिएको छ।

अब नेतृत्वको रिक्तता चाँडै नभरेमा प्रतिष्ठानको समग्र प्रगति नै प्रभावित हुने चिन्ता बढ्दो छ।