विवादबीच पनि पाथीभरा केबलकार निर्माण अगाडि बढ्ने

धरान/  प्रसिद्ध धार्मिक स्थल ताप्लेजुङको पाथीभरा (मुक्कुमलुङ) मन्दिरसम्म निर्माणाधीन केबलकार परियोजना अब कानुनी अड्चनबिना अगाडि बढ्ने भएको छ।

सर्वोच्च अदालतले परियोजनालाई रोक्न माग गर्दै दायर रिटमा अन्तरिम आदेश दिन अस्वीकार गरेपछि निर्माण कार्य अघि बढ्ने बाटो खुलेको हो।

न्यायाधीश डा. नहकुल सुवेदी र अब्दुल अजिज मुसलमानको संयुक्त इजलासले बुधबार सुनुवाइ गर्दै रिट निवेदकले उठाएका तर्कमा परियोजना तत्काल रोक्नुपर्ने प्रष्ट कानुनी आधार नभएको ठहर गरेको हो।

रिट निवेदकले केबलकारले पाथीभरा मन्दिरको धार्मिक, सांस्कृतिक र वातावरणीय महत्वमा असर पार्ने भन्दै काम रोक्न माग गरेका थिए।

तर सर्वोच्चले विस्तृत छलफल र प्रमाणका आधारमा मात्र अन्तिम निर्णय हुने भन्दै अहिलेलाई काम रोक्न आवश्यक नभएको उल्लेख गरेको छ।

यो निर्णयसँगै निर्माण कम्पनीले अब केबलकार परियोजनालाई निरन्तरता दिन सक्ने भएको छ। पाथीभरा मन्दिरमा वार्षिक लाखौं भक्तजन पुग्ने गर्दछन्, र केबलकार बनेपछि तीर्थयात्रीहरूका लागि यात्रा थप सजिलो र सुरक्षित हुने अपेक्षा गरिएको छ।

यद्यपि परियोजनाविरुद्ध उत्रिएको समूहले मन्दिरको मौलिकता गुम्ने र वातावरणमा असर पर्ने तर्क गर्दै विरोध जारी राखेको छ। उक्त समूहकै रिटमा सुनुवाइ गर्दै अदालतले हालका लागि बाटो खुला गरे पनि अन्तिम फैसला आउन अझै बाँकी रहेको स्पष्ट पारेको छ।

परियोजना पक्षले सर्वोच्चको निर्णयलाई सकारात्मक संकेत मानेको छ भने विरोधी पक्षले अझै कानुनी लडाइँ जारी राख्ने संकेत दिएका छन्।