नेपाल आज हङकङसँग भिड्दै, सुपर थ्री पुग्ने लक्ष्य

काठमाडौं/आइसीसी महिला टी–२० विश्वकप एसिया छनोट अन्तर्गत नेपालले आज हङकङसँग खेल्नेछ। समूह 'सी' मा रहेको नेपाल र हङकङबीचको खेल थाइल्यान्डको बैंककस्थित टेरथाई क्रिकेट ग्राउन्डमा बिहान ११ः१५ बजे सुरु हुने तालिका छ।

डबल राउण्ड रोबिन प्रणालीमा भइरहेको प्रतियोगितामा यी दुई टोलीबीचको पहिलो खेल वर्षाका कारण टस हुनुअघि नै रद्द भएको थियो। त्यसपछि नेपालले बहराइनलाई पराजित गर्दै पहिलो जित दर्ता गरिसकेको छ।

हङकङको दुवै खेल वर्षाले प्रभावित बनाएको छ। सोमबार बहराइनविरुद्धको खेलमा पनि हङकङले बलिङ सुरु गर्न नपाउँदै वर्षाले खेल अवरुद्ध भयो। बहराइनले ४ ओभरमा १५ रन बनाइसकेको अवस्थामा खेल रोकिएको थियो।

आजको खेल नेपालका लागि निकै महत्त्वपूर्ण छ। यदि नेपालले हङकङलाई पराजित गर्न सफल भयो भने एक खेल अगावै समूह विजेता बन्दै सुपर थ्री चरणमा प्रवेश गर्नेछ।

यस छनोट प्रतियोगितामा ९ टोलीलाई तीन समूहमा विभाजन गरिएको छ। प्रत्येक समूहको शीर्ष टोलीले सुपर थ्रीमा स्थान बनाउनेछ। सुपर थ्रीमा पुगेका तीन टोलीले एक–आपसमा प्रतिस्पर्धा गर्नेछन्, जसबाट शीर्ष दुई टोलीले आगामी वर्ष हुने आईसीसी महिला टी–२० विश्वकपको ग्लोबल क्वालिफायरमा स्थान बनाउनेछन्।