_1693980289.gif "#")
सुनसरी /सुनसरीको भोक्राहा नरसिंह गाउँपालिकाबाट अन्दाजी ३० वर्षीया एक महिला अपहरणमा परेको खबर प्राप्त भएको छ।
भोक्राहा नरसिंह गाउँपालिका–३ घर भई हाल वडा नम्बर ४ को मोडेल चोक नजिकै अब्दुल अन्सारीको मकै खेतमा अस्थायी रूपमा बसोबास गर्दै आएकी बोल्न नसक्ने (लाटी) महिला हिजो (शुक्रवार) राति करिब १० बजे अपहरणमा परेकी हुन्। उनी बोल्न नसक्ने श्याम लाल खत्बेको श्रीमती भएको खुलेको छ।
अपहरणको जानकारी स्थानीय बासिन्दाले राति करिब १०ः३० बजे चिरौली चोकमा रहेको प्रहरी कार्यालयमा दिएका थिए।
सूचना प्राप्त भएपछि प्रहरी सहायक निरीक्षक अमर खड्काको नेतृत्वमा चिरौली प्रहरी चौकीबाट एक टोली घटनास्थलतर्फ खटिएको थियो। त्यसैगरी जिल्ला प्रहरी कार्यालय सुनसरीबाट प्रहरी निरीक्षकहरू सबिना लिम्बु र प्रकाश पराजुलीको कमाण्डमा अर्को टोली पनि परिचालित गरिएको थियो।
अपहरण भएको स्थान चिरौली चोकबाट करिब ३ किलोमिटर पूर्व–उत्तरतर्फ पर्ने बताइएको छ।
हाल अपहरणमा संलग्न व्यक्तिहरूको पहिचान खुल्न सकेको छैन। प्रहरीले स्थानीयहरूसँगको समन्वयमा हराएकी महिलाको खोजी कार्य तीव्र बनाएको जनाएको छ।
