धरानमा ठूलो परिमाणको लागू औषधसहित दुई जना पक्राउ

धरान/ सुनसरीको धरानमा प्रहरीले ठूलो परिमाणको लागू औषधसहित दुई जनालाई पक्राउ गरेको छ।

जिल्ला प्रहरी कार्यालय सुनसरीका अनुसार २०८२/०१/२३गते धरान उपमहानगरपालिका–३ स्थित क्वालिटी फुड कर्नर होटल एण्ड लजको कोठा नम्बर ३ बाट ३१ वर्षीय निखिल उर्फ वसन्त राजवंशीलाई नियन्त्रणमा लिइएको हो। उनी कैलाली, धनगढीका स्थायी बासिन्दा हुन्।

राजवंशीको साथबाट ३७० क्याप्सुल स्पास्मोप्रोक्सिभोन बरामद गरिएको प्रहरीले जनाएको छ।

त्यसैगरी, सोही दिन साँझ ८:१५ बजे धरान उपमहानगरपालिका–८ स्थित सभागृह नजिकैको एक घरमा गरिएको अर्को छापामा ३८ वर्षीय मनोज विक पक्राउ परेका छन्।

प्रहरीका अनुसार विकको कोठाबाट ८९२ क्याप्सुल स्पास्मोप्रोक्सिभोन, ७० चक्की नाइट्रोसन र ४० बोतल कोडिनयुक्त खैरसिरप (स्कुफ) बरामद गरिएको छ।

पक्राउ परेका दुवैजनालाई इलाका प्रहरी कार्यालय धरानमा राखी आवश्यक कानुनी कारबाही प्रक्रिया अगाडि बढाइएको प्रहरीको भनाइ छ।