प्रशेष पाण्डे ‘भ्वाइस अफ नेपाल’ सिजन–६ का विजेता बने

काठमाडौं/सांगीतिक रियालिटी टिभी शो ‘भ्वाइस अफ नेपाल’ सिजन–६ को उपाधि धादिङका प्रशेष पाण्डेले जितेका छन्। शुक्रबार राति काठमाडौंमा सम्पन्न ग्रान्ड फिनालेमा उनी विजयी घोषित भए।

प्रशेष पाण्डे कोच खेम सेन्चुरीको समूहबाट प्रतिस्पर्धामा उत्रिएका थिए।

उनले कोच मेलिना राईको समूहका खोटाङका रोशन राई, कोच राजु लामाको समूहका इलामका प्रमेश राई र कोच उदय सोताङको समूहकी सिक्किमकी अर्पणा आचार्यलाई पछि पार्दै उपाधि जिते।

फिनालेमा रोशन राई फस्ट रनरअप, प्रमेश राई सेकेन्ड रनरअप र अर्पणा आचार्य थर्ड रनरअप घोषित भए।

विजेता बनेका पाण्डेले उपाधिसँगै २० लाख रुपैयाँ नगद प्राप्त गरेका छन्। साथै, अन्य दुई प्रायोजकबाट उनले थप १–१ लाख रुपैयाँ जितेका छन्।

विजयपछि प्रतिक्रिया दिँदै प्रशेष पाण्डेले फरक क्षमता भएकाहरू पनि गायनमा उत्कृष्ट हुनसक्ने प्रमाण आफूले पेश गरेको बताए। उनले आफ्नो जितलाई फरक क्षमता भएका व्यक्तिहरूको जितको रूपमा व्याख्या गरे।

हिमालय टेलिभिजनमा झण्डै दुई महिनादेखि प्रसारण भइरहेको भ्वाइसको छैटौं सिजन अन्त्यसँगै च्यानलले अब ‘द भ्वाइस किड्स नेपाल’ को तयारी गरिरहेको छ।