सुनसरी/ सशस्त्र प्रहरीले धरानबाट ठूलो परिणाममा लागुऔषध गाँजा बरामद गरेको छ।
धरान उपमहानगरपालिका–१३ स्थित निशाने डाँडाबाट भेडेटारतर्फ आउँदै गरेको नम्बर प्लेटविहीन ट्रकबाट ७८३ किलो गाँजा बरामद गरिएको हो।
सशस्त्र प्रहरी बलको १ नम्बर बराह बाहिनी मुख्यालय सुनसरी र सुरक्षा बेस धरानको संयुक्त टोलीले शंका लागेपछि ट्रक जाँच गर्दा गाँजा भेटिएको हो।
खोजतलासका क्रममा ट्रकमा ना ७ ख २८१ नम्बरको प्लेट पनि फेला परेको छ।
ट्रकका चालक ३१ वर्षीय मनोज परियार (सुनसरी) र सहचालक १८ वर्षीय आकाश राई (धनकुटा)लाई नियन्त्रणमा लिइएको सशस्त्र प्रहरी बलका सहप्रवक्ता डीएसपी शैलेन्द्र थापाले जानकारी दिए।
पक्राउ परेका दुवै जनालाई ट्रक र बरामद गरिएको गाँजासहित थप कारबाहीका लागि बुधबार राति जिल्ला प्रहरी कार्यालय, सुनसरीमा बुझाइएको उनले बताए।
