_1693980289.gif "#")
सुनसरी/ धरानबाट हराएको एक बस विराटनगरमा टुक्र्याउँदै कवाडीमा बिक्री गरिरहेको अवस्थामा फेला परेको छ।
सुनसरीको धरान–८, दुर्गापथस्थित ग्यारेजबाट बैशाख १२ गते चोरी भएको प्रदेश १–०२–००१–९७४९ नम्बरको बस मंगलबार दिउँसो विराटनगर–१२, मंगलबारे चौक नजिकै रोकेर टुक्र्याइएको अवस्थामा भेटिएको हो।
बसका पाटपूर्जाहरू भने विराटनगर–६ स्थित गीतादेवी साहले सञ्चालन गर्दै आएकी कवाडी गोदामबाट प्रहरीले बरामद गरेको छ।
बसका चक्का, भित्री फलामको रिङ, इन्जिन लगायतका सामाग्री कवाडीमा बेच्न तयारी अवस्थामा थिए। बस व्यवसायी हरेन्द्र चेम्जोङका अनुसार, हराएको बस खोज्दै जाँदा उक्त अवस्थामा फेला परेको हो।
प्रहरी घटनास्थलमा पुगेपछि गोदाम सञ्चालक गीतादेवी साह भारततर्फ भागेको आशंका गरिएको छ भने उनको सहयोगीका रूपमा रहेका ज्वाँई दिपेन्द्र साह पनि फरार रहेका छन्।
धरानबाट चोरी भएको बसको अगाडि “सिद्धदेवी यातायात” र तल “याक्थुङ यातायात” लेखिएको देखिन्छ। चोरीपछिको बसको यात्रा सीसी क्यामेराबाट ट्र्याक गर्दा खोर्सानेसम्म पुगेको पुष्टि भएको छ।
स्थानीयले मंगलबारेमा बस वेवारिसे अवस्थामा देखेपछि प्रहरीलाई खबर गरेका थिए। अहिले बस चोरीमा संलग्न गिरोहको खोजी तीव्र पारिएको मोरङ प्रहरीले जनाएको छ।
