_1693980289.gif "#")
विराटनगर/ कोशी प्रदेश माओवादी केन्द्रले चुरे–तराईका जनतालाई लक्षित गर्दै ९ दिने ‘चुरे तराई जनसाङ्गीतिक अभियान’ सुरु गरेको छ। अभियानको बुधबार उदयपुरको कटारी बजारबाट भव्य सुरुआत गरिएको छ।
अभियानको उद्घाटन माओवादी केन्द्रका उपमहासचिव तथा कोशी प्रदेश इञ्चार्ज हरिबोल गजुरेलले गरे। प्रदेश सचिवालयको निर्णयअनुसार सञ्चालनमा ल्याइएको अभियान अन्तर्गत हरेक दिन प्रदेशका विभिन्न ठाउँमा सांस्कृतिक कार्यक्रम गरिँदैछ।
प्रदेश अध्यक्ष हर्कबहादुर नेम्वाङ ‘मिक्सो’का अनुसार अभियानको उद्देश्य प्रचण्ड नेतृत्वको सरकारद्वारा गरिएको कामको सन्देश जनतामा पुर्याउनु हो। सुशासन, भ्रष्टाचारविरुद्धको लडाइँ, सामाजिक न्याय, र अन्तर्राष्ट्रिय मञ्चमा देशको पहिचान निर्माणजस्ता विषय कार्यक्रमको मूल सन्देशका रुपमा प्रस्तुत गरिएका छन्।
कार्यक्रममा जनसांस्कृतिक महासंघ कोशी प्रदेशका कलाकारहरूले माओवादी विचार र जनसमस्या सम्बोधन गर्ने नाटक, गीत, सामूहिक नृत्य र कविता प्रस्तुत गर्दै छन्। सांस्कृतिक टोलीको नेतृत्व राकेश किराँती, अनुशा राईलगायतले गरिरहेका छन्।
हरेक कार्यक्रममा १–२ जना मात्र राजनीतिक वक्ता राखिने र पाँचवटा सांस्कृतिक प्रस्तुति समावेश गरिने योजना छ। “अबको बाटो” शीर्षकमा प्रस्तुत हुने नाटक विशेष आकर्षण हुने आयोजकले जनाएका छन्।
नेम्वाङका अनुसार कार्यक्रमहरूमा गर्मीको बाबजुद जनसहभागिता उत्साहजनक रहेको छ। “गाडीमा कोही ल्याइएको छैन, स्वतःस्फूर्त सहभागिता देखिएको छ,” उनले दाबी गरे।
यसअघि माओवादीले तराई–मधेश हुलाकी राजमार्ग केन्द्रित अभियान सञ्चालन गरेको थियो।
यो नयाँ अभियान २०८४ को निर्वाचनलाई लक्षित गरी पार्टीको जनाधार विस्तार गर्ने रणनीतिक योजनाअन्तर्गत गरिएको हो।
