_1693980289.gif "#")
काठमाडौं/ आईसीसी यू–१९ विश्वकप एसिया छनोटमा नेपाल अपराजित यात्रा जारी राख्दै तेस्रो जित हात पार्न सफल भएको छ।
(बुधबार) आज तल्लो मुलपानी क्रिकेट मैदानमा नेपालले हङकङलाई ९ विकेटले सहजै पराजित गर्दै बलिङ र ब्याटिङ दुवै क्षेत्रमा दबदबा जमायो।
हङकङले दिएको ११६ रनको सामान्य लक्ष्य नेपालले १२.३ ओभरमा मात्र १ विकेटको क्षतिमा पुरा गर्यो।
ओपनर साहिल पटेलले अविजित ४२ रन बनाउँदा कप्तान नरेन भट्ट ३९ रनमा नटआउट रहे। सुरुवातमा निरज यादवले २३ रनको योगदान दिएका थिए।
त्यसअघि टस जितेर पहिले ब्याटिङको निर्णय लिएको हङकङ ४६.२ ओभरमा सबै विकेट गुमाउँदै ११५ रनमै सीमित भयो।
हङकङका लागि शिव माथुरले सर्वाधिक ६३ रन बनाए भने आर्या पन्जवानीले १३ र वीर माथुरले १२ रन बनाए।
१० रनमै पहिलो विकेट गुमाएको हङकङले माथुर र पन्जवानीको संयमित साझेदारीमा केही सम्हालिएको संकेत देखाए पनि त्यसपछि लगातार विकेट गुमाउँदै सानो योगफलमै समेटिन पुग्यो।
नेपालका लागि युवराज खत्रीले घातक बलिङ गर्दै १० ओभरमा १८ रन खर्चिएर ४ विकेट लिए। विपिनप्रसाद शर्माले ६.२ ओभरमा २४ रन दिँदै ३ विकेट झारे। सन्तोष यादवले २ तथा अशोक धामीले १ विकेट लिए।
यसअघि नेपालले यूएई र ओमानलाई पराजित गरिसकेको छ। अब नेपालले शनिबार समूह चरणको अन्तिम खेलमा अफगानिस्तानसँग प्रतिस्पर्धा गर्नेछ।
अपराजित अफगानिस्तानले आजै यूएईविरुद्ध ३५९ रनको विशाल स्कोर बनाएको छ। यदि अफगानिस्तानले यो खेल जित्यो भने शनिबारको भिडन्त नेपाल र अफगानिस्तानबीचको फाइनलजस्तै हुनेछ।
_Poush 22_1736170149.jpg "#")
_1734253975.jpg "#")
