झापा र मोरङमा चट्याङ लागेर दुई जनाको मृत्यु

विराटनगर/  झापा र मोरङ जिल्लाको दुई स्थानमा चट्याङ लागेर दुई जनाको मृत्यु भएको छ।

चैत्र २७ गते बिहान ७ बजे झापाको गौरादह नगरपालिका–५, बालुबथानमा चट्याङ लाग्दा एक महिलाको मृत्यु भएको हो।

पाँचथरको मिक्लाजुङ गाउँपालिका–३ घर भई हाल बालुबथानमा बस्दै आएकी ५४ वर्षीया दूधकुमारी लावतीलाई भान्साकोठा छेउमा चट्याङ पर्दा घटनास्थलमै मृत्यु भएको इलाका प्रहरी कार्यालय दमकले जनाएको छ।

प्रहरीले कानूनी प्रक्रिया पूरा गरी शवलाई पोस्टमार्टमको लागि दमक अस्पताल पठाएको छ।

त्यसैदिन दिउँसो १२स्३० बजे मोरङको कानेपोखरी गाउँपालिका–१, होक्लाबारीस्थित मामाघर आएका १२ वर्षीय आविष्कार बराललाई वर्षासँगै परेको चट्याङ लाग्दा गम्भीर घाइते भएका थिए।

सुनसरीको इटहरी स्थायी घर भएका बालकको विराटनगरस्थित विराट टिचिङ अस्पतालमा उपचारको क्रममा पौने २ बजे मृत्यु भएको प्रहरीले जनाएको छ।