_1693980289.gif "#")
सुनसरी/ धरानको पहिचान झल्काउने नयाँ संरचना"आरा धरान" ले अहिले पर्यटकहरूलाई तान्न थालेको छ।
मेयर हर्क साम्पाङको अगुवाइमा धरान–१३ र २० वडाको संगमस्थल सर्दु जलाधार क्षेत्र (पूर्वको ओसो पार्क) मा निर्माण गरिएको श्रमसंस्कृति पार्क अहिले चर्चामा छ।
पार्कभित्र इतिहास बोकेको ‘आरा धरान’ स्तम्भ, दिदीबहिनी पार्क र श्रमसंस्कृति झल्काउने संरचनाले सबैको ध्यान खिचेको छ।
विशेष गरी “धरान” नामको उत्पत्तिबारे जानकारी नहुने धेरैका लागि यो पार्क एउटा पाठशालासरह बनेको छ।
कलाकार रोजन राईका अनुसार—“घना जंगल फडानी गरेर काठ चिर्ने आरावालाहरुले बनाएको ‘धराप’ नै पछि ‘धरान’ नाममा परिणत भएको हो।” त्यही ऐतिहासिक सन्दर्भलाई जीवन्त बनाउन काठबाट निर्मित आरा धरानको सम्पूर्ण संरचना बनाइएको छ।
फलैचा, धारा, घेराबारा, सबैकुरा काठकै।
स्थानीय बासिन्दा मात्र होइन, बाह्य पर्यटक पनि यो नयाँ संरचना देखेर चकित छन्। तेह्रथुमबाट आएका पर्यटक हिमाल राई भन्छन्—“एक समयको सुनसान बगरमा यति सुन्दर पार्क बन्नु आफैंमा चमत्कार हो।”
यसअघि ओसो पार्कको नाममा परिचित रहेकाले, अहिले ‘श्रमसंस्कृति पार्क’ को नयाँ परिचयले धरानको पहिचान फेरिएको छ।
पार्कको बीच भागमा दुई दिदीबहिनीको शालिक र माथिल्लो हिस्सामा अवस्थित आरा धरानले यो स्थानलाई इतिहास र पर्यटनको संगम बनाएको छ।
धरानको पहिचान, इतिहास र श्रमसंस्कृतिलाई समेट्ने यो पार्क अब सेल्फी स्पट मात्र होइन, धरानको गर्विलो गाथा सुनाउने ठाउँ बन्दै गएको छ।
