लागु औषध विरुद्ध धरानः मेयरको अभियान सुधारबार, कम भएन कारोबार

धरान/ धरानका नगर प्रमुख हर्कराज राई साम्पाङ ले प्रत्येक शुक्रबार लागु औषध दुर्व्यसनविरुद्ध सचेतना कार्यक्रम चलाउँदै आएका छन् । उनले शुक्रबारलाई सुधारबारका रुपमा अभियान नै चलाएका छन् ।

धरानका विभिन्न वडामा नगर प्रमुख साम्पाङले सचेतना कार्यक्रम चलाउँदै आएका छन् । तर लागु औषध कारोबारी र प्रयोगकर्ता लुकिछिपी बेचबिखनमा लिप्त छन् । नियन्त्रित लागु औषध समाजका लागि घातक रहेको सचेतना नगर प्रमुख फैलाउँदै हिंड्छन् । तर यो चुनौतीविरुद्ध कसरी लड्ने ठोस कदम पहिल्याउन सकिएको छैन ।

धरानमा प्रहरीले प्रत्येक दिन लागूऔषधसहित प्रयोगकर्ता र बेचबिखनमा संलग्नलाई नियन्त्रणमा लिने गरेको छ । शनिबार र आइतबार लागूऔषधसहित ८ जनालाई प्रहरीले पक्राउ गरेको छ ।

यो तथ्यले नियन्त्रित लागूऔषधको बढ्दो प्रयोग र बेचबिखनमा नियन्त्रण नभइरहेको अवस्था देखाउँछ । प्रहरीले धरानका विभिन्न स्थानबाट नियन्त्रित लागूऔषधसहित ८ जनालाई पक्राउ गरेको छ ।

धरान–९ स्थित बगैंचा लाइनबाट शनिबार प्रहरीले ४ जनालाई नियन्त्रणमा लियो । भारत घर भएका ३० वर्षीय विजय साह, धरान–९ का २७ वर्षीय निरन्जन यादव, धरान–१० का २५ वर्षीय विशेष राई र धरान–१७ का २६ वर्षीय निश्चल राईलाई प्रहरीले नियन्त्रणमा लिएको छ ।
वडा प्रहरी कार्यालय धरानले विजयको कोठा तलासी गर्दा उक्त लागूऔषध फेला पारी उनीहरूलाई पक्राउ गरेको जनाएको छ ।
यस्तै शनिबार नै धरान–११ स्थित सुनुवार सङ्घको भवन छेउबाट स्थानीय २२ वर्षीय सन्जीव सुनुवार र १९ वर्षीय सविन परियारलाई रेल्वे प्रहरीले नियन्त्रणमा लिएको छ ।

यस्तै आइतबार धरान–८ स्थित भोटेपुलबाट अस्थायी प्रहरी बिट वरगाछीबाट खटिएको प्रहरी टोलीले २ जनालाई नियन्त्रणमा लिएको छ ।
नियन्त्रित लागूऔषधसहित धरान–८ का ५६ वर्षीय राजु छेत्री धरान–१६ का २९ वर्षीय सकुल अधिकारी पक्राउ परेका छन् ।
दुई दिनमा प्रहरीले पक्राउ परेकाहरूबाट ठूलोमात्रामा लागूऔषध नियन्त्रणमा लिएको छ ।
शनिबार बगैँचा लाइनबाट ट्रामाडोल १ हजार ४ सय ४० ट्याब्लेट, नाइट्राजेपाम ७५ ट्याब्लेट र स्पास्मो ८० ट्याब्लेट बरामद गरेको छ ।
यस्तै धरान–११ बाट ट्रामोल ४ सय ६० ट्याब्लेट र स्पास्सपेन ४ सय ६९ ट्याब्लेट बरामद गरेको छ । यसैगरी धरान–८ भोटेपुलबाट स्पास्मो १ सय २२ ट्याब्लेट नियन्त्रणमा लिएको छ ।

धरान प्रहरीले लागु औषधविरुद्ध बेलाबेला ‘स्टिङअप्रेसन’ गर्ने काम गर्दै आएको छ । ‘हिरासतलाई सुधार गृहको रूपमा व्यवस्थित गर्ने’ अभियानसमेत सञ्चालन गर्दै आएको छ । सकारात्मक जीवनयापनका लागि उत्प्रेरणामूलक डकुमेन्ट्री प्रदर्शन गर्ने, विद्यालयमा दुव्र्यसनविरुद्ध अन्तर्क्रिया गर्नेलगायतका काम गर्दै आएको छ । तर धरानमा लागु औषधको चुनौती उत्तिकै रहेको तथ्यले देखाइरहेको छ ।